خانه » حسین صبا کیم دی؟ موغام مسابقه سی نه دی؟

حسین صبا کیم دی؟ موغام مسابقه سی نه دی؟

بو گونلر بین الخلق موغام مسابقه سینده، حسین صبایا آدلانان بیر ایران آذربایجانلیسین خئیلی ائشیدیریک. یئری وار حسین صبانی و موغام مسابقه لرین آرتیغراق تانییاق.

موغام موسیقیسی، یالنیز آذربایجانجا یوخ، بلکه فارسجادا و عربجه ده، مُقام موسیقی سینه آدلانان بیر گئنیشلی موسیقی دی و بو دیللر و کولتورلر آراسیندا چوخ اشتراکلار وار دی. قرآن قرائتینده یا عرب موسیقیسینده، نئجه کی بایات اوخونور، فارسجادا و آذربایجانجادا بایات موسیقیسی اوخونور البته فرقلی دیلر آمما دینله ین و ائشیدن بو دیللری باش تاپماسادا، بیلر کی ایندی ماهور یا سه گاه اوخونور. بو یاخین کولتورلر ده، بیر بیرینه چوخلو بورجلار دا وئرمیشلر. اؤرنک ایچون بیزیم تورک بایاتیمیز یا قاراباغ شکسته میز فارسجایا گئدیب و عربجه دن حجاز و عراق، فارس موسیقی سینه یول تاپیب. بیزده فارس موسیقی سیندن (آدین قویاق ایران موسیقیسی) کورد بایاتین آلمیشیق و بو آلیش ـ وئریشده، بوتون دیللرین موسیقیسی آغیرلانیب و زنگینله شیب دی.

موغام موسیقیسیده سازین پرده سی یا بارماق دوتان پرده لر ایله چئشیدلی سسلر یارانیر. بونلارا بیز دستگاه دئییریک نئجه کی فارسجادا دست، ال معناسیندا و گاه، یئر آنلامیندا دی و دستگاه ، ال دوتولان یئره و پرده لر دوتولان یئرلره دئمه لییک. بو دستگاهلار ایران موسیقیسینده 12 موغام و آذربایجاندا 13 موغاما بؤلونور و راست، ماهور، قاجار بایاتی، شور، سه گاه، همایون و باشقا آدلارا آدلانیر. دستگاهلارین هره سی نئچه گوشه یه بؤلونور و اونون شاکیله سی تیکیلیر. میثال اوچون ایران موسیقیسینده ماهور دستگاهیندا گوشه لرین آدینا باخساق گؤره ریک نه قدر یان قونشولاردان و یاخین کولتورلردن تأثیر آلمیشیق: راک هندی، آذربایجانی، عراق، راک کشمیر، ساقی نامه، کرشمه و … .

باکی دا قورولان موغام مسابقه سی 2005 ینجی ایلدن، آذربایجانین گؤرکملی گؤزل بسته کاری اوزه ییر حاجی بی لی نین 120 ینجی آنادان دوغولماسی ایچون کئچیریلدی. اوندان بئله ایکی ایلدن بیر، 2007 ده، 2009، 2011، 2013، 2015، 2017 ایللرینده کئچیریلدی و بو مسابقه لرده بؤیوک موغامچی لار آذربایجان موسیقیسینه تانیتدیریلدی کی بیری 10 یاشیندا نابغه، علم الدین ابراهیموو ایدی.

2019ـ ونجو ایلین مسابقه سینده 500 اوخوجو بو مسابقه یه آیاق قویدو و داورلر بونلارین آراسیندان 60 اوخوجو و ایکینجی کره، 20 اوخوجو سئچدیلر کی بو 20 اوخوجو اصلی مسابقه یه آیاق قویدولار. بو آغیر ماراتون دا، مسابقه نین باشلاییشینا آیاق قویان اوخوجو دا بؤیوک فخر قازانیر نیه کی بو ایکی ایلده 20 اوخوجودان بیری تانینیر حتی ایلک مرحله ده حذف اولونسا.

2019 ونجو ایلین موغام مسابقه لرینده 500 اوخوجودان 60 ی و 60دان 20 سی سئچیلیب و فخر ایله: ایکی ایرانلی بیری اردبیلدن و بیری میانادان بو مسابقه یه یول تاپدیلار. اردبیللی بهنام علایی اوچونجو مرحله ده حذف اولوب آمما میانالی حسین صبا 6 مرحله نی سوووب و 7 ینجی مرحله یه آیاق قویوبدو.

آمما حسین صبا کیمدی؟

حسین صبادان اؤنجه گرکدیر اونون آتاسین تانیمالی. حسین ین آتاسی اؤزوندن شؤهرتلی دی. هوشنگ صبا میانانین آدلیم شاعیرلریندن تانینیر کی ایللر بویو اونون شعرلری، درگیلرده و کیتابلاردا یاییلیب کی بیریسی رحمتلیک اوستاد یحیی شیدانین “ادبیات اوجاغی” کیتابی دی. نئجه کی درین دویغولو و درین فیکیرلی شعرینده سؤیلور:

هر شاعر دلداده صبا شاعر اولانماز    شاعر دئییلن اصلیده انسان گرک اولسون

یا باشقا بیر غزلده نه گؤزل شعر یارادیر:

وئرمه رم بیر تار مویون ای گؤزل! دنیایه من    اولموشام مجنون عشقین دوشموشم صحرایه من

من صبا یم، سؤزلریم یانمیش اورکلر دردی دیر    قویموشام عشقین یولوندا عؤمرومو سرمایه من

هوشنگ صبا 68 ایل بوندان قاباق، میانا شهرینده دونیایا گؤز آچدی. صبا میانانین قدیمی معلم لریندن تانینیر کی 30 ایل مدرسه لرده میانانین اوشاقلارین تربیت قیلیب. اوشاقلیغیندا مدرسه لرده و برنامه لرده جاز و تنبک چالاردی و رحمتلیک بهرام سارنگ (آزیمکان) ایله سرود گروپوندایمیش. صبا موسیقیدن آرتیق، تئاتردا دا چالیشقان گنج ایمیش و نئچه شهرلره ایفا یا مسابقه ایچون گئتمیش دی کی اونلاردان سایماق اولار: دومانلی یول، نازنین و اون دان آرتیق باشقا تئاترلار.

ایندی حسین صبایا چاتمالییق کی حسین ین ایلک معلمی همین فخرلی آتا ایمیش. بو آتا موسیقی ده اوغلون تربیت قیلیب سونرا آرتیق اؤیرنمک ایچون اونو تبریزه و باکی یا گؤنده ریر نیه کی میانادا آذربایجان موغام موسیقیسی گوجسوز ایدی.

حسین 31 ایل بوندان قاباق، میانا شهرینده آنادان اولوب، آواز و قاوال و تنبکی آتاسیندان اؤیرندی. تبریزده موغام موسیقیسین اوستاد ملکی زاده نین مکتبینده اؤیره نیب و آرتیق اؤیرنمک ایچون ایکی ایل آراسیندا باکی دا اوستاد منصوم ابراهیموو و طیار بایراموون مکتبینده موغام موسیقیسین بیتیریب و ایندی موسیقی مهدینده 20-30 ایل چالیشان موسیقی اؤیرنجی لرله آیاق ـ آیاق رقابت ائدیر و هر هفته باش اوجالی چوخ یوخاری نمره ایله باشقا مرحله یه آیاق قویور.

آرزیمیز بو دور حسین صبانی سون مرحله ده گؤرک نئجه کی اؤنجه تبریزلی ناصر عطاپور آدلی اوخوجو بو مسابقه لرده اوچونجو سئچیلدی. حسین صبانین حضورو بو مسابقه ده، مینلر ایرانلینی، آذربایجاندا، اردبیلده، همداندا، زنجاندا، تهراندا و باشقا بؤلکه لرده بو مسابقه نین باخماغینا و ایزله مه یینه چکیر. حسینه باش ساغلیغی آرزیلیریق.

3 1 رای
رأی دهی به مقاله
اشتراک در
اطلاع از
guest

2 دیدگاه ها
قدیمی‌ترین
تازه‌ترین بیشترین رأی
بازخورد (Feedback) های اینلاین
مشاهده همه دیدگاه ها
محمدی
محمدی
4 سال قبل

کلن نچه مرحله قالییر؟

نصیری
نصیری
4 سال قبل

چهارده مرحله است. مرحله نهایی با حضور 6 هنرمند برگزار میشود.